Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Në qytetin Kan Jounis në jug të Rripit të Gazës po zhvillohen luftime të ashpra. Ato kanë nisur mbrëmë dhe kanë vazhduar edhe gjatë orëve të mëngjesit të sotëm. Radio Evropa e Lirë njofton se këto luftime vazhduan pasi Izraeli e vazhdoi ofensivën tokësore falë vendimit të Shteteve të Bashkuara për t’i bllokuar përpjekjet për ndaljen e luftimeve dhe për t’i dërguar ushtrisë izraelite më shumë municion urgjentisht. “Izraeli është përballur me kritika dhe thirrje për një armëpushim, sepse i ka vrarë mijëra palestinezë civilë dhe i ka zhvendosur gati 85 për qind të 2.3 milionë banorëve të Gazës brenda territorit të rrethuar, ku, sipas Organizatës së Kombeve të Bashkuara, nuk ka mbetur me asnjë vend i sigurt për t’u strehuar. Por, Shtetet e Bashkuara i ka dhënë mbështetje jetike ofensivës së Izraelit në ditët e fundit, së pari duke vënë veto ndaj rezolutës së Këshillit të Sigurimit të OKB-së, që bënte thirrje për ndaljen e luftimeve, dhe pastaj duke ia shitur Izraelit në mënyrë të përshpejtuar një sasi municioni për tanke në vlerë rreth 100 milionë dollarë” njofton Radio Evropa e Lirë.
