Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Parlamenti Evropian ka miratuar të mërkurën rezolutën për Shqipëria, në të cilën vlerësohet përparimi i vendit në procesin e integrimit evropian, duke përshëndetur angazhimin e autoriteteve shqiptare për avancimin e negociatave të anëtarësimit në Bashkimi Evropian. Në dokument, eurodeputetët mirëpresin hapjen e kapitujve negociues dhe marrin në konsideratë objektivin e Shqipërisë për përmbylljen e negociatave deri në fund të vitit 2027. Rezoluta nënvizon se mbështetja e lartë e qytetarëve shqiptarë për anëtarësimin në BE mbetet një faktor i rëndësishëm, ndërsa thekson se progresi i vendit kontribuon në stabilitetin dhe sigurinë e gjithë rajonit. Parlamenti Evropian kërkon vazhdimin e reformave dhe përafrimin e mëtejshëm të legjislacionit shqiptar me standardet e Bashkimit Evropian, duke theksuar se ritmi i integrimit duhet të shoqërohet me zbatim të plotë dhe të qëndrueshëm të reformave. Rezoluta ndalet edhe te zhvillimet politike të brendshme, duke përmendur zgjedhjet parlamentare të vitit 2025 dhe shqetësimet e ngritura për procesin zgjedhor. Eurodeputetët shprehin po ashtu shqetësim për polarizimin e vazhdueshëm politik dhe diskursin konfrontues, duke vlerësuar se këto fenomene mund të ndikojnë negativisht në funksionimin e institucioneve demokratike, mbikëqyrjen parlamentare dhe besimin e qytetarëve. Parlamenti Evropian thekson se rruga e Shqipërisë drejt anëtarësimit në Bashkimin Evropian nuk matet vetëm me hapjen apo mbylljen e kapitujve negociues, por edhe me cilësinë e reformave dhe zbatimin efektiv të tyre në praktikë.
