Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Seanca e fundit në Kuvendin e Shqipërisë, shënoi një ri-konfigurim të numrave në favor të shumicës në kuotën e 81 votave. Deputetët e PDIU-së gjatë votimit të projektligjeve bashkuan votat me socialistët dhe socialdemokratët. Sinjalin e parë e dha Shpëtim Idrizi duke votuar pro projektligjit të menaxhimit financiar, votimin në tërësi me 77 vota. Ndërsa në një tjetër projektligj atë të taksimit të dyfishtë tre nga katër deputetët e PDIU-së, Mesila Doda, Shpëtim Idrizi dhe Nusret Avduallai votuan pro duke shënuar numrin 79 vota në favor të shumicës socialiste. Vetëm pak javë më parë grupi të deputetëve socialistë ju bashkua edhe deputeti i Partisë së Lirisë, Agron Çela. Nëse në këtë seancë për arsye shëndetësore nuk do të mungonin dy deputetët socialistë: Aurora Mara dhe Agron Cela votimi do të shënonte 81 vota në favor të shumicës socialiste. Shpëtim Idrizi votoi po ashtu pro projektligjit të një huaje për ndërtimin e ujësjellësit të Durrësit. Ky është një sinjal i qartë i rreshtimit tashmë të PDIU-s në një krah me shumicën e Edi Ramës e cila mbërrin në 81 vota në parlament. Por nuk mbaron me kaq ndryshimi votave në parlament. Socialistët shpresojnë të shkojnë në 82 vota nëse deputeti më i ri në kuvend Gezim Ademaj nga PDIU do të ndjekë të njëjtën linjë votimi me partinë e tij. Kjo lëvizje e PDIU vjen në një moment kur kanë nisur të bëhen llogaritë dhe koalicionet parazgjedhore për lokalet e 14 majit. Deri më tani Sali Berisha ka nënshkruar marrëveshje për zgjedhjet me Ilir Metën dhe Vangjel Dulen. Ndërsa Dash Shehi i LZHK-së një aleat i vjetër i PD-së, zgjodhi të hedhë firmën në një aleancë elektorale me Bindjen Demokratike, themeluar nga Astrit Patozi dhe disa lëvizje studentore. (Top Channel)
