Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Ish-ambasadorja e Kosovës në SHBA dhe nënkryetarja e PDK-së, Vlora Çitaku, ka reaguar ashpër ndaj pëlqimit publik të një shkrimi denigrues dhe akuzues ndaj ish-Presidentit Hashim Thaçi nga një përfaqësues diplomatik i Republikës së Kosovës, duke e cilësuar këtë veprim si pasqyrim të një mentaliteti politik të instaluar në qeverisje. Në një reagim publik, Çitaku ka theksuar se ky veprim nuk është as rastësi dhe as qëndrim individual, por dëshmi e një qasjeje politike ku sulmi ndaj figurave të historisë shtetformuese është shndërruar në mjet politik. Sipas saj, përdorimi ose mbështetja e gjuhës përçarëse ndaj Presidentit që shpalli Pavarësinë e Kosovës përbën dëm të drejtpërdrejtë për imazhin dhe interesin shtetëror. Çitaku ka theksuar se Hashim Thaçi po përballet prej vitesh me drejtësinë në Hagë për Kosovën dhe jo për interesa personale, duke e bërë edhe më të papranueshëm, sipas saj, çdo sulm institucional ndaj tij në këtë fazë. Ajo ka nënvizuar se diplomatët dhe konsujt nuk janë aktivistë partie, por përfaqësues zyrtarë të shtetit që mbajnë përgjegjësi të veçantë për gjuhën dhe mesazhet që përcjellin. Sipas Çitakut, qëndrime të tilla prodhojnë pasoja serioze dhe dëmtojnë interesat e Kosovës në arenën ndërkombëtare. Për këtë arsye, ajo ka kërkuar shkarkimin e menjëhershëm të konsullit në fjalë, duke theksuar se Kosova meriton përfaqësim dinjitoz, profesional dhe unifikues në ambasadat dhe konsullatat e saj në mbarë botën.
