Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Diplomati i Zyrës së Departamentit Amerikan të Shtetit për Çështje Evropiane dhe Euroaziatike, Brendan Hanrahan, ka zhvilluar takime të ndara me krerët e partive kryesore në Kosovë, përfshirë kryetarin e PDK-së Memli Krasniqi, deputeten e LDK-së Hykmete Bajrami dhe përfaqësues të Listës Serbe. Këto takime vijnë në një kohë bllokade të thellë institucionale në vend dhe përfaqësojnë vizitën e parë të nivelit të lartë nga administrata e re amerikane në Prishtinë. Kryetari i PDK-së, Memli Krasniqi, ka thënë se me diplomatin amerikan ka diskutuar për zhvillimet politike në vend dhe rajon, si dhe për domosdoshmërinë e një marrëveshjeje përfundimtare mes Kosovës dhe Serbisë me njohjen reciproke në qendër. Ai theksoi përkushtimin e partisë së tij për bashkëpunim dhe zgjidhje që i shërbejnë interesit të qytetarëve. Hykmete Bajrami nga LDK-ja theksoi nevojën për zgjidhje të krizës së krijuar pas zgjedhjeve të 9 shkurtit, duke ndarë me diplomatin amerikan propozimin për një qeveri kalimtare që do të mundësonte tejkalimin e bllokadës dhe kthimin në normalitet institucional deri në zgjedhjet presidenciale të vitit 2026. Ajo shprehu edhe gatishmërinë për diskutimin e modeleve të tjera gjithëpërfshirëse që do të sillnin stabilitet.
