Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Sot në Bibliotekën Kombëtare, “Pjetër Bogdani”, në Prishtinë, është përuruar libri, “Ali Aliu Kelmendi- Ringjallja e Prometeut”, vepër letrare publicistike e veprimtarit dhe shkrimtarit të njohur, Avni Dehari.
Fillimisht para të pranishmëve të shumtë në amfiteatër, në përurim të këtij libri, foli kryetari i Shoqatës së të Burgosurve Politikë, Hydajet Hyseni. Ai në një shkrim të tij analitik, ka spikatur momentet krijuese që ka ndërlidhur autori i librit, Avni Dehari duke shkruar për personalitetin shumëdimensional të Ali Aliut-Kelmendit, një atdhetar i devotshëm i Çështjes Kombëtare, i cili tërë jetën ishte angazhuar në rrugën e lirisë për bashkimin e trojeve të Shqipërisë. “Nuk ka qenë e lehtë për autorin ta shkruajë këtë libër meqë veprimtari, Ali Aliu ka një biografi tejet të pasur me të dhëna të shumta të aktivitetit të tij atdhetar, qysh nga Lufta e Dytë Botërore, ku ai mori pjesë në luftën Antifashiste dhe vazhdoi aktivitetin e tij deri le lufta e UÇK-së dhe e çlirimit të Kosovës nga robëria shekullore sllave e serbe. Falë përkushtimit dhe ruajtjes së materialeve në periudha të ndryshme, Avni Dehari, e ka begatuar deri në nivelin maksimal këtë monografi voluminoze me 700 faqe, ka thënë mes tjerash në fjalën e tij, Hydajet Hyseni.
Një fjalë rast ka mbajtur edhe, Faik Rexhepi, bashkëveprimtari edhe shoku i Ali Aliut, i cili në fjalën e tij të shkurtë përkujtoi faktin se Presheva gjithmonë i ka dhënë figura me rëndësi kombëtare historisë së Shqipërisë. Ali Aliu është një figurë e ndritur që kontribuoi për çështjen kombëtare. E tërë jeta e tij është histori, theksoi ai.
Në fund, të përurimit të librit, autori, Avni Dehari, foli për metodologjinë së cilës iu ka përmbajtur gjatë hartimit të monografisë, e cila me shumësinë e fakteve e të dhënave, ia ka kushtëzuar edhe formatin letrar, publicistik e artistik, në mënyrë që kjo vepër ta prezantojë sa më denjësisht personalitetin, jetën, veprimtarinë dhe kontributin madhor që ka dhënë, Ali Aliu dhe familja e tij, në rrugën e rezistencës së pandalshme, historike të popullit shqiptar për çlirim dhe bashkim kombëtar. Autori i librit, Avni Dehari ka spikatur faktin se Ali Aliu-Kelmendi gjatë tërë jetë së tij nuk i devijoi bindjet dhe qëndrimin e drejtë atdhetar, edhe pse regjimi jugosllav e kishte arrestuar, persekutuar dhe e kishte mbajtur në burg disa herë duke e degdisur edhe në Burgun famëkeq të Goli Otokut.
Gjatë përurimit janë lexuar edhe pjesë të librit, ndërsa në fund familjarët e Ali Aliut kanë falënderuar të pranishmit për pjesëmarrje në përurim.
