Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Në fjalën e hapjes, kryeredaktorja e Radios-Kosova e Lirë, Arbanë Qeriqi-Gashi tha se “poezia e poeteshës dhe veprimtares, Mona Agrigoroaiei, kryesisht i dedikohet motivit të atdhedashurisë, trojeve shqiptare ende të degdisura dhe të ndara në disa shtete, iu dedikohet dëshmorëve të kombit e në veçanti dëshmorëve të tri ushtrive tona çlirimtare. Si e tillë ajo e mbanë vulën dhe emblemën e poezisë atdhetare, e cila është karakteristikë sidomos për poetët e mërgimit, madje edhe ata të Rumanisë, dikur një segment shumë i rëndësishëm i Rilindjes Kombëtare Shqiptare”.
Në fjalën e tij, profesor, Qerim Rexhaj foli për temat, motivet dhe veçoritë krijuese të poezive të Mona Agrigoroaiei, duke segmentuar sidomos motivin patriotik, përkushtimin për dëshmorët e kombit, por edhe karakterin realist të disa poezive ku ajo ka stigmatizuar politikanët, të cilët interesat e tyre individuale e klanore i vunë mbi interesat e kombit e Atdheut, madje duke pretenduar se i kanë kryer të gjitha detyrat. Profesor Rexhaj ka çmuar lart angazhimin poetik letrar të poeteshës rumune me origjinë shqiptare, Mona Agrigoroaiei, e cila qysh në rininë e hershme ishte edukuar me frymën e idealeve për realizimin e aspiratave tona kombëtare.
Simboli i Rezistencës Kombëtare, Adem Demaçi, përshëndeti poeteshën Agrigoroaiei, duke e përgëzuar për nxjerrjen në dritë të librit me poezi dhe duke e lavdëruar punën, angazhimin dhe kontributin e saj në prezantimin e së vërtetës shqiptare kudo në trojet tona por edhe në Rumani.
Në fund të përurimit, autorja Mona Agrigoroaiei falënderoi të pranishmit, veçmas Radion-Kosova e Lirë e cila nxori në dritë përmbledhjen me poezi “Shtegu i çlirimit”.
