Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Procesi i vettingut në gjyqësi, prokurori, nivele të larta në polici dhe Agjencinë e Kosovës për Inteligjencë (AKI) është synimi kryesor i qeverisjes së mundshme të LDK-së dhe Lëvizjes Vetëvendosje. Këto dy parti janë duke u zotuar për reforma rrënjësore në sistemin e drejtësisë dhe kthimin e besimit të qytetarëve ndaj këtyre institucioneve. Në tryezën me temën “Prioritetet legjislative në fushën e sundimit të ligjit: Një perspektivë nga legjislatura e re e Kuvendit”, të organizuar nga GLPS-ja, Albulena Haxhiu nga Lëvizja Vetëvendosje, ka thënë se në takimin me LDK-në do të flasin për sundimin e ligjit. Ajo ka deklaruar se një prej synimeve kryesore të qeverisjes së tyre është kthimi i besimit të qytetarëve në institucionet e drejtësisë. Ndërsa Armend Zemaj nga LDK-ja, ka thënë se ndryshimet efikase do të ndodhin dhe se kërkohet edhe hartim i legjislacionit. Zemaj ka thënë se është i domosdoshme bashkëpunimi me Kuvendin dhe shoqërinë civile.
