Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Është hera e parë që një kryetar i Kuvendit të Kosovës, sot më 23 mars 2023, në ditën e parë të Ramazanit ndërpret seancën në emër të iftarit, edhe pse ndoshta vetëm dy tre deputetë agjërojnë, por mjaftojnë edhe aq sa për të marrë shkas dhe për të mos e vazhduar seancën, ku me të drejtë po kritikohet e po demaskohet qëndrimi i kryeministrit, Albin Kurti lidhur me marrëveshjen shumë të dëmshme që ka lidhur në Ohër me kryetarin e Serbisë, Vuçiq.
Nuk besoj se me rregulloren e Kuvendit mund të ndërpritet seanca për shkak të iftarit, sepse Kosova është shtet laik dhe një veprim i tillë në radhë të parë është lojë e papërgjegjshme e atyre që aksidentalisht udhëheqin Kuvendin që dy vjet, për fatkeqësinë tonë më të madhe.
Hipokrizia, është vesi më i dënueshëm në islam dhe jo vetëm në këtë fe por në çdo fe tjetër monoteiste.
Andaj, përdorimi i iftarit për ta ndërprerë seancën, nga ata që nuk agjërojnë, që nuk e përfillin asnjë prej kushteve të islamit, shumë prej tyre kanë edhe qëndrim fyes duke e trajtuar islamin në Kosovë si fe ekstreme, si fe të pushtuesit e të tjera, është qëndrim i turpshëm dhe i pajustifikueshëm.
Janë shënuar sa e sa raste kur ateisti me përcaktim eklektik, ideologjik, Albin Kurti ndërpret fjalimet e tij për ta dëgjuar ezanin, edhe pse këmba e tij kurrë nuk ka hyrë brenda ndonjë xhamie, për lutje jo se jo, por as për vizitë, përveç ndoshta gjatë vizitave në Turqi për tu paraqitur mysliman i devotshëm para Erdoganit apo Çavushoglut.
Kjo hipokrizi, kalon caqet e vetë vesit si të tillë dhe është përcaktues i karakterit labil, të pavendosur, laraman fetar dhe antifetar në të njëjtën kohë, i krerëve aktualë të Kosovës.
Respekt për ata që agjërojnë e jo për ata që agjërimin e të tjerëve e shfrytëzojnë për qëllime taktike të politikave ditore.
