Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Kuvendi i Kosovës ka dështuar për të 25-tën herë me radhë të konstituohet, duke thelluar krizën institucionale dhe duke dëshmuar mungesën e vullnetit politik për zgjidhje. Deputetët e legjislaturës së nëntë, të dalë nga zgjedhjet e jashtëzakonshme të shkurtit, nuk kanë arritur as këtë të hënë të zgjedhin kryetarin e ri të Kuvendit. Për të shtatëmbëdhjetën herë rresht, ligjvënësit kanë refuzuar formimin e komisionit që do të mbikëqyrte një votim të fshehtë për zgjedhjen e kryetarit. Vetëm 51 deputetë mbështetën propozimin, shumë larg pragut prej 61 votash të nevojshme. Si pasojë, seanca u shty edhe një herë për 48 orë, me afatin e radhës të vendosur për të mërkurën, më 4 qershor. Ky ngërç po vazhdon pavarësisht se kaluan më shumë se katër muaj nga mbajtja e zgjedhjeve, duke prodhuar një precedent të paprecedent institucional për një demokraci parlamentare. Kriza aktuale e nxjerr në pah një papërgjegjësi të thellë politike, ku kalkulimet partiake dhe interesat afatshkurtra po mbizotërojnë mbi interesin publik dhe funksionimin e shtetit. Ndërkohë, qytetarët e Kosovës mbeten peng i një përplasjeje që paralizon jetën institucionale dhe cenon parimin themelor të përfaqësimit demokratik.
