Sadete Tërnava-Osmani: Sepse-të dhe pse-të për villim-vitin shkollor

E nxitur kjo nga një bisedë e gjatë që sot e pata për pranimin e fëmijëve në shkollë të mesme, gjë që ne definitivisht duhet ta rishikojmë si ABC-në e nevojave, me pyetjen se pse sistemi ynë arsimor tundohet kaq shumë, sidomos kur bëhet fjalë për rastet e “sfidueshme”.

Ka shumë e shumë arsye por ndoshta si përkujtues për udhëheqesit e arsimit, këto përgjigje janë disa këshilla që ndihmojnë:

-Sepse shkolla do të duhej të ishte shtëpia e dytë, sidomos për nxënesit që kanë më shumë nevoja;

-Sepse aty të pret mësuesi/ja, me zë e me sy të butë;

-Sepse menaxhmenti i shkollës e i drejtoratit e kupton tekstin, kontekstin e nëntekstin e nevojave të secilit nxënës e sidomos të atyre me aftësi të kufizuar;

-Sepse diagnoza e mjekut dhe fjalët e psikologut flasin vetë;

– Sepse prindërit e këtyre fëmijëve duan siguri, empati e profesionalizëm pa pasur nevojë t’ua shpjegojnë ekstra nevojat atyre që janë të presupozuar dhe të thirrur t’i kuptojne nevojat automatikisht;

-Sepse këta prindër punojnë e rropaten fort për me i mbajtë fëmijët me nevoja, dhe se kur të shkojnë në punë ata duhet të gjejnë mirëkuptim, avantazh që të jenë të qetë ta kryejnë punën e tyre.

E tash pyetjes se pse edhe pas 26 vjetësh në liri nuk po mund të konsolidohemi profesionalisht e të punojmë ma mirë e ma drejt për nxënësit dhe prindërit në nevojë, as unë nuk di t’i pergjigjem, por acarohem se pse edhe këtu, në këtë platformë komunikimi, ku ka shumë profesionistë flitet kaq pak për arsimin e edukimin e për ndryshimin e mendësisë; pse shumica e prindërve në nevojë ofshajnë, qajnë e planifikojnë të ikin e të gjejnë rrugëdalje në Evropë apo Amerikë.

Ka edhe shumë pse të tjera për profesionalizëm, kreativitet e mbështetje për arsimin dhe fëmijët tanë, por pak zgjidhje, sepse po vuajmë nga mendësia e tejkaluar, dembelia, akomodimi dhe depresioni kolektiv ku askush nuk mërzitet për askend.

E merreni me mend, grupet e margjinalizuara, përfshirë këtu femijët e prindërit në nevojë bēhen atraktiveë vetëm në fushata zgjedhore! OMG!

1 Shtatori, ardhtë ma i mirë për të gjithë, veçanërisht për nxënësit me aftësi të kufizuar dhe prindërit e tyre!