Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Mandatarit për formimin e Qeverisë së re, Glauk Konjufca, po i afrohet afati ligjor prej pesë ditësh për të dorëzuar para Kuvendit përbërjen e kabinetit të ri. Deri më 19 nëntor, Konjufca duhet të dëshmojë nëse ka siguruar votat e mjaftueshme për një ekzekutiv të përkohshëm, por panorama politike mbetet e pandryshuar. Apeli i Konjufcës ndaj partive parlamentare që të tejkalojnë inatet dhe të votojnë një Qeveri tranzitore deri në prillin e vitit të ardhshëm, kur përfundon mandati i presidentes Vjosa Osmani, nuk ka gjetur mbështetje. PDK, LDK, AAK dhe Nisma kanë përsëritur se nuk do ta votojnë një qeveri të kryesuar nga ai, duke e shtyrë vendin drejt zgjedhjeve të parakohshme. Memli Krasniqi nga PDK ka deklaruar se Konjufca “nuk i ka numrat”, ndërsa LDK përmes Berat Rukiqit e ka cilësuar nominimin për mandatar si një tentativë të Vetëvendosjes për të fituar kohë. Nga ana tjetër, Ramush Haradinaj ka bërë të ditur se është kontaktuar nga zyra e Konjufcës për takim, por nuk ka pranuar, duke e quajtur përpjekjen jo serizoze. Me partitë që po qëndrojnë në pozicionet e tyre dhe afatin që po skadon, skenari i zgjedhjeve të parakohshme po bëhet gjithnjë e më real.
