Komuna e Ferizajt vlerësohet lart në Raportin e Monitorimit të Konsultimeve Publike për vitin 2024

Sipas raportit, Komuna e Ferizajt ka arritur 100 pikë të plota për planifikimin e hershëm të konsultimeve publike, si dhe për hartimin dhe publikimin e raportit vjetor të konsultimeve publike, duke dëshmuar përkushtim të lartë në respektimin e procedurave dhe standardeve të kërkuara.

Raporti i KLGI-së thekson gjithashtu se Komuna e Ferizajt ka dorëzuar me kohë edhe projekt-propozimet për konsultimet publike për periudhën janar–dhjetor 2023, duke siguruar që proceset e pjesëmarrjes qytetare të jenë të hapura, të planifikuara dhe të monitoruara në mënyrë të rregullt.

Në kuadër të monitorimit të 26 komunave, janë evidentuar disa të dhëna të përgjithshme sa i përket mbledhjes së komenteve, komunikimit dhe adresimit të tyre.

Në këtë raport, dhjetë komuna janë vlerësuar me përmbushje maksimale të indikatorëve: Ferizaj, Gllogoci, Dragashi, Istogu, Lipjani, Podujeva, Prizreni, Malisheva, Mitrovica e Jugut dhe Graçanica.