Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Muaji shkurt pritet të shënojë një pikë kritike në proceset gjyqësore ndaj Hashim Thaçit dhe krerëve të tjerë të UÇK-së përballë Gjykatës Speciale. Përveç gjykimit për krime lufte, më 24 shkurt 2026 do të nisë edhe procesi për pengim të drejtësisë, ku pritet të paraqiten tre dëshmitarë kryesorë deri më 6 mars. Ndërkohë, gjykimi për krerët e UÇK-së ka hyrë në fazën finale. Mbrojtjet e Hashim Thaçit dhe Jakup Krasniqit kanë njoftuar trupin gjykues se nuk do të thërrasin më dëshmitarë ose paraqesin prova shtesë, duke mbyllur kështu çështjet e tyre. Ky vendim pasoi refuzimin për të shtuar Bislim Zyrapin në listën e dëshmitarëve, duke kufizuar më tej mundësinë e mbrojtjes për të ndikuar në çështjen e provave. Prokuroria dhe mbrojtjet kërkuan ndryshime në afatet për dorëzimin e dosjeve përfundimtare dhe fjalët finale, duke propozuar afate më të gjata. Gjykata Speciale vendosi që dosjet përfundimtare të dorëzohen më 19 janar, ndërsa fjalët finale do të zhvillohen nga 9 deri më 13 shkurt, si dhe më 16 dhe 18 shkurt. Pas kësaj, gjyqtarët do të kenë të paktën tre muaj për të dhënë vendimin përfundimtar. Parashikohet që vendimi i parë në këtë rast, për Hashim Thaçin dhe krerët e tjerë të UÇK-së, të shpallet në fund të majit ose më së largu në fillim të qershorit 2026. Ky moment konsiderohet vendimtar.
