Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Ndihmat financiare të njëhershme të shpërndara nga Qeveria e Kosovës, përfshirë pagesat prej 100 eurosh për studentë dhe kategori të tjera, po vihen në pikëpyetje për efektin e tyre real dhe afatgjatë në mirëqenien e qytetarëve. Visar Ymeri, drejtor i Institutit “Musine Kokalari”, ka vlerësuar se këto masa janë më shumë lehtësuese momentale sesa zgjidhje të qëndrueshme për problemet ekonomike të familjeve. Në një deklaratë për “Radion Evropa e Lirë”, ai theksoi se qasja aktuale nuk adreson problemet strukturore të varfërisë dhe pabarazisë sociale. “Shtesat e njëhershme mund ta lehtësojnë një moment krize, por nuk e ndryshojnë realisht pozitën ekonomike të familjeve”, tha Ymeri. Ai ngriti dyshime edhe për mungesën e vlerësimit të ndikimit të këtyre transfereve financiare, duke theksuar se nuk ka të dhëna të qarta nëse ato kanë ndikuar në uljen e varfërisë. “Ne nuk e dimë nëse këto transfere financiare e kanë ulur varfërinë”, vëren ai. Sipas Ymerit, problemi nuk qëndron te ekzistenca e ndihmave, por te modeli i mirëqenies sociale që po ndërtohet në Kosovë. Ai kërkon politika sociale më të qëndrueshme, me qasje transformuese dhe me targetim më të saktë të familjeve në nevojë. “Pyetja nuk është nëse duhet të ketë ndihma, por çfarë modeli të mirëqenies duam të ndërtojmë”, thekson ai.
