Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Deputeti i Aleancës për Ardhmërinë e Kosovës, Besnik Tahiri, ka ngritur shqetësime lidhur me çështjen e çmimeve të naftës në vend, duke zbuluar detaje nga një takim që ka zhvilluar me ministren Mimoza Kusari-Lila. Tahiri ka bërë të ditur se, pavarësisht mospajtimeve politike, ai ka kërkuar takim institucional me ministren, ku i ka dorëzuar një shkresë zyrtare të protokolluar, duke kërkuar trajtim serioz të çështjes dhe koordinim me Ministrinë e Financave. Sipas tij, kërkesat e tij janë të bazuara në analiza dhe konsultime profesionale, e jo qëndrime të rastësishme. Ai theksoi se i ka kërkuar Kusari-Lilës që të komunikojë me institucionet përgjegjëse për të sqaruar situatën dhe për të ndërmarrë veprime konkrete lidhur me rritjen e çmimeve. Megjithatë, Tahiri kritikoi ashpër mënyrën se si është trajtuar kjo çështje nga ana e ministres, duke vlerësuar se ajo ka marrë një barrë që nuk i takon. Sipas tij, çështje të tilla duhet të trajtohen në nivel të kabinetit qeveritar dhe jo përmes deklarimeve individuale, duke kërkuar më shumë transparencë dhe llogaridhënie institucionale për qytetarët.
