Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Kryeministri në detyrë i Kosovës, Albin Kurti, ka kritikuar ashpër udhëheqjen e Sindikatës së Bashkuar të Arsimit, Shkencës dhe Kulturës, duke deklaruar se kreu i saj, Rrahman Jasharaj, ka më shumë se dy dekada në krye të sindikatës dhe se, sipas tij, udhëheqja aktuale nuk i ka ndjekur ndryshimet në sistemin arsimor. Kurti ka theksuar se gjatë kësaj periudhe kanë ndryshuar mësimdhënësit, nxënësit dhe vetë struktura e arsimit, ndërsa ka nënvizuar nevojën për reforma edhe brenda sindikatës. Nga ana tjetër, Jasharaj i ka kundërshtuar deklaratat e kryeministrit, duke e akuzuar qeverinë për qasje të ashpër dhe, siç tha ai, armiqësore ndaj SBASHK-ut. Ai ka theksuar se mandati i tij është rezultat i votës së shumicës së punëtorëve të arsimit dhe jo vendim personal. Sipas Jasharajt, tensionet mes tij dhe Kurtit kanë marrë edhe karakter personal, pasi ai pretendon se kryeministri ka pritur ndryshim të qëndrimeve të sindikatës. Debati mes palëve vjen në një periudhë të ndjeshme të marrëdhënieve mes qeverisë dhe sektorit të arsimit, ku kërkesat sindikale dhe politikat qeveritare vazhdojnë të mbeten në qendër të përplasjeve publike.
