Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Analisti dhe publicisti Behxhet Shala ka vlerësuar se zgjedhjet parlamentare të 7 qershorit do të karakterizohen nga një garë e fortë politike, ndërsa rezultati final, sipas tij, do të varet nga tre faktorë kryesorë: pjesëmarrja e përgjithshme në votime, vota e diasporës dhe orientimi i votuesve të pavendosur. Shala kritikoi ashpër fushatën zgjedhore të partive politike, duke pretenduar se subjektet po përdorin premtime të mëdha elektorale në përpjekje për të siguruar mbështetjen e qytetarëve. Sipas tij, Lëvizja Vetëvendosje synon të ruajë epërsinë përmes mobilizimit të votuesve të pavendosur dhe diasporës, ndërsa partitë opozitare po përpiqen të konsolidojnë elektoratin e tyre tradicional. Shala parashikon se Partia Demokratike e Kosovës mund të shënojë rritje të numrit të deputetëve nëse arrin të ruajë mbështetjen që kishte në zgjedhjet e mëparshme. Ndërkohë, ai vlerëson se Lidhja Demokratike e Kosovës mund të rikuperojë pjesërisht rezultatin e saj, ndërsa Aleanca për Ardhmërinë e Kosovës pritet të ruajë një përfaqësim mesatar parlamentar. Sipas analizës së tij, Lëvizja Vetëvendosje mund të mbetet subjekti më i madh politik, por pa siguruar shumicën e nevojshme për formimin e qeverisë e vetme. Për këtë arsye, ai konsideron se pas zgjedhjeve pesha kryesore do të jetë te negociatat për koalicione dhe jo vetëm te rezultati numerik i partive. Shala thekson se qeveria e ardhshme, pavarësisht se nga kush do të formohet, ka gjasa ta përfundojë mandatin e plotë katërvjeçar nëse siguron stabilitet politik dhe mbështetje parlamentare.
