Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Ambasadori i Mbretërisë së Bashkuar në Kosovë, Jonathan Hargreaves, ka bërë thirrje që partitë politike të marrin përgjegjësitë e tyre dhe të formojnë institucionet e vendit menjëherë pas certifikimit të rezultateve zgjedhore. Gjatë një vizite në Qendrën e Numërimit të Votave në Sallën “1 Tetori” në Prishtinë, Hargreaves u shpreh i impresionuar nga puna dhe përkushtimi i ekipeve të numërimit dhe vëzhguesve, si dhe nga masat e reja të transparencës të zbatuara në procesin zgjedhor. Në këtë vizitë, ambasadori britanik ishte i shoqëruar nga kryetari i Komisionit Qendror të Zgjedhjeve, Kreshnik Radoniqi, dhe ushtruesja e detyrës së shefes së Zyrës së Bashkimit Evropian në Kosovë, Eva Palatova. “U bashkova me kryetarin e Komisionit Qendror të Zgjedhjeve, Kreshnik Radoniqi, dhe me ushtruesen e detyrës së shefes së BE-së në Kosovë, Eva Palatova, në një vizitë në qendrën e numërimit të votave në Prishtinë. U impresionova nga angazhimi i ekipeve të numërimit dhe vëzhguesve dhe u interesova për masat e reja të transparencës që janë futur në fuqi. Sapo të certifikohen rezultatet e zgjedhjeve, do të jetë koha që partitë politike të bëjnë pjesën e tyre dhe të krijojnë institucionet”, ka deklaruar Hargreaves. Deklarata e ambasadorit britanik vjen në një kohë kur procesi i numërimit të votave është në fazën përfundimtare, ndërsa pritet certifikimi zyrtar i rezultateve nga Komisioni Qendror i Zgjedhjeve, hap që do t’i hapë rrugë formimit të institucioneve të reja të Kosovës.
