Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Komiteti për të Drejtat e Njeriut i Odës së Avokatëve të Anglisë dhe Uellsit (BHRC) po prezanton sot në Hagë gjetjet e raportit të tij mbi funksionimin e Dhomave të Specializuara të Kosovës. Raporti ishte iniciuar pas një kërkese të Institucionit të Avokatit të Popullit të Kosovës dhe u publikua disa javë më parë.
Aktiviteti po organizohet me mbështetjen e Ambasadës së Kosovës në Hagë dhe u hap nga ambasadori i Kosovës në Holandë, Dren Doli. Në takim po marrin pjesë përfaqësues të korit diplomatik, ekspertë dhe aktorë të tjerë të interesuar.
Megjithëse raporti trajton drejtpërdrejt punën dhe funksionimin e Dhomave të Specializuara, përfaqësues të kësaj gjykate nuk morën pjesë në ngjarje, ndonëse, sipas organizatorëve, ishin ftuar.
Avokati i Popullit i Kosovës, Naim Qelaj, shprehu keqardhjen për mungesën e përfaqësuesve të Dhomave të Specializuara.
“Do të doja që Dhomat e Specializuara të ishin këtu dhe nuk e di pse nuk kanë ardhur”, deklaroi Qelaj para të pranishmëve.
Ai theksoi se raporti i BHRC-së është hartuar në mënyrë të pavarur dhe se Institucioni i Avokatit të Popullit nuk ka ushtruar asnjë ndikim mbi përmbajtjen apo përfundimet e tij.
Raporti i ekspertëve britanikë ka ngritur një sërë çështjesh dhe shqetësimesh lidhur me aspekte të funksionimit të Dhomave të Specializuara, të cilat po diskutohen në kuadër të prezantimit të sotëm në Hagë.
