Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Komisioni Qendror i Zgjedhjeve ka bërë të ditur se shpallja e rezultateve përfundimtare të zgjedhjeve të 7 qershorit për Kuvendin e Kosovës do të bëhet vetëm pasi të përfundojnë të gjitha procedurat ankimore dhe të merren vendimet përfundimtare nga institucionet kompetente. Zëdhënësi i KQZ-së, Valmir Elezi, ka deklaruar se institucioni është në pritje të shqyrtimit të ankesave dhe të vendimmarrjeve përkatëse, për të parë nëse ato përmbajnë obligime konkrete që duhet të zbatohen nga KQZ-ja para shpalljes së rezultateve. Sipas tij, nëse vendimet e institucioneve përgjegjëse nuk parashehin veprime shtesë për KQZ-në, atëherë rezultatet përfundimtare do të mund të publikohen menjëherë pasi ato të marrin formë të prerë. Elezi ka sqaruar gjithashtu se shpallja e rezultateve përfundimtare nuk nënkupton përfundimin e plotë të procesit zgjedhor, pasi subjektet politike dhe palët e interesuara kanë të drejtë të parashtrojnë ankesa edhe ndaj këtij akti. Ai ka theksuar se vetëm pas përfundimit të afateve ligjore për ankesa, zbatimit të vendimeve eventuale dhe certifikimit të rezultateve, procesi zgjedhor mund të konsiderohet i përmbyllur në aspektin administrativ. Ndërkohë, kandidatët për deputetë të PDK-së, Bekim Haxhiu dhe Qëndrim Kryeziu, i janë drejtuar Gjykatës Supreme duke kërkuar rinumërim të plotë të votave të kandidatëve të kësaj partie, pasi ankesat e tyre u refuzuan më herët nga Paneli Zgjedhor për Ankesa dhe Parashtresa.
