Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Kryetari i Partisë Socialdemokrate, Dardan Molliqaj, ka kritikuar ashpër Lidhjen Demokratike të Kosovës dhe kryetarin e saj, Lumir Abdixhiku, pas marrëveshjes së arritur me Lëvizjen Vetëvendosje për kandidaturën e Bekim Sejdiut për president të Kosovës. Molliqaj ka akuzuar LDK-në se, në vend që të veprojë si subjekt opozitar, me qëndrimet dhe veprimet e fundit politike po kontribuon në funksionalizimin dhe forcimin e pushtetit, duke e cilësuar rolin e saj si pjesë të një strukture që, sipas tij, po ndërtohet nga pushteti aktual. “LDK-ja është një tullë në ngrehinën që është duke e ngritur pushteti”, ka deklaruar Molliqaj, duke e bërë përgjegjës Abdixhikun dhe subjektin që ai drejton për zhvillimet e fundit në skenën politike. Sipas tij, LDK-ja nuk po paraqet një alternativë të qartë ndaj pushtetit, por po i krijon atij mundësi për të siguruar funksionimin institucional në një kohë kur vendi vazhdon të përballet me krizë politike. Molliqaj ka kritikuar veçanërisht rolin e Abdixhikut në proceset aktuale, duke pretenduar se ai dhe LDK-ja janë shndërruar kryesisht në mekanizëm për sigurimin e kuorumit në Kuvend. “Lumiri me LDK-në nuk është asgjë më tepër se kuorum. Vetëm aq. Pastaj as aq”, ka shkruar ai, duke e ashpërsuar kritikën ndaj kreut të LDK-së dhe duke vënë në pikëpyetje rolin e kësaj partie në zhvillimet e fundit politike në Kosovë.
