Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Albin Kurti, ka bërë të ditur se përpjekjet për gjetjen e një zgjidhjeje rreth zgjedhjes së presidentit do të vazhdojnë përmes takimeve dhe komunikimit me subjektet e tjera politike. Ai ka thënë se synimi është që vendi të mos shkojë sërish në zgjedhje, të cilat i konsideron të panevojshme në rrethanat aktuale. Kurti nuk ka dhënë detaje për përmbajtjen e bisedimeve, por ka theksuar se është në kontakt të vazhdueshëm me përfaqësues të forcave të tjera politike. Deklarata e tij vjen në kohën kur procesi për zgjedhjen e presidentit është komplikuar pas kundërshtimit të gjashtë deputetëve të LDK-së ndaj kandidaturës së Bekim Sejdiut, për të cilin janë pajtuar LVV-ja dhe LDK-ja. I pyetur për subjektet që kanë paralajmëruar se mund të mos marrin pjesë në procesin e zgjedhjes së presidentit, Kurti ka shmangur komentimin e drejtpërdrejtë dhe ka kërkuar që këto pyetje t’u drejtohen vetë deputetëve dhe partive që kanë paralajmëruar bojkot. “Vazhdojmë me takime, bisedime në mënyrë që ta zgjedhim presidentin dhe të mos kemi nevojë t’i përsërisim zgjedhjet që janë të paarsyeshme”, ka deklaruar ai. Ndërkohë, një ditë para vazhdimit të seancës konstituive të Kuvendit, Kurti ka konfirmuar se deputetët e Vetëvendosjes do të jenë të pranishëm në seancën e thirrur për 9 shtator, ndërsa nuk ka treguar nëse partia e tij do të paraqesë kandidat për kryetar të Kuvendit. Procesi për krijimin e institucioneve të reja mbetet i lidhur me gjetjen e një marrëveshjeje politike mes partive, ndërsa zgjedhja e presidentit kërkon mbështetje më të gjerë parlamentare. Në këtë situatë, Kurti ka përsëritur se rruga e dialogut politik duhet të vazhdojë me synimin për të shmangur një tjetër proces zgjedhor.
