Në Komunën e Vitisë gjatë këtyre ditëve është zhvilluar një punëtori kushtuar menaxhimit dhe përdorimit të qëndrueshëm të mbetjeve organike, me pjesëmarrjen e përfaqësuesve të institucioneve vendore dhe partnerëve ndërkombëtarë.
Në kuadër të kësaj punëtorie, një delegacion nga qyteti i Kirchhainit të landit të Hesenit, të kryesuar nga kryetari Olaf Hausmann, së bashku me përfaqësues nga Universiteti Justus Liebig i Gisenit dhe Universiteti i Prishtinës “Hasan Prishtina”, kanë zhvilluar vizita në institucione të ndryshme komunale, si dhe te fermerë dhe biznese në Viti.
Qëllimi i këtyre vizitave ishte njohja nga afër me gjendjen aktuale, identifikimi i mundësive për bashkëpunim dhe prezantimi i projektit ORG-VITI, i cili financohet nga Fondacioni Federal Gjerman për Mjedisin (DBU).
Gjatë punëtorisë janë zhvilluar diskutime lidhur me mundësitë e hartimit të një dokumenti konceptual, i cili në të ardhmen do të shërbejë si bazë për aplikim në fonde të ndryshme, me synim realizimin e një projekti konkret për menaxhimin e mbetjeve organike në territorin e komunës së Vitisë.
Në kuadër të takimeve të zhvilluara gjatë këtyre ditëve, kryetari i Komunës së Vitisë, Sokol Haliti, dhe kryetari i Kirchhainit, Olaf Hausmann, kanë shprehur gatishmërinë për të shqyrtuar mundësi të reja bashkëpunimi ndërmjet dy komunave, me qëllim të realizimit të projekteve të përbashkëta në të dyja komunat, të cilat kanë një partneritet zyrtar përmes binjakëzimit.
Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
