Marrëveshja për Specialen mbetet në pritje të votës, Kuvendi sërish pa vendimmarrje

Kuvendi i Kosovës po e zvarrit një çështje që prej kohësh është pjesë e debatit politik dhe institucional në vend. Rishqyrtimi i Ligjit për Dhomat e Specializuara, i kthyer nga presidentja për shqyrtim të sërishëm, po shoqërohet me vonesa, konsultime politike dhe mungesë të një vendimi përfundimtar.
Në një kohë kur përfaqësuesit e partive politike deklarojnë se kanë arritur marrëveshje, qytetarët presin të kuptojnë se çfarë përmban ajo marrëveshje, cilat janë garancitë politike dhe juridike dhe si do të veprojnë deputetët në momentin e votimit.
Deklarata e Vlora Çitakut se “ka marrëveshje” ngre një pyetje të natyrshme: nëse marrëveshja ekziston, pse vendimmarrja nuk u realizua sipas dinamikës së paralajmëruar?
Për një çështje kaq të ndjeshme, Kuvendi nuk mund të mjaftohet me deklarata të shkurtra dhe marrëveshje të komunikimit politik. Deputetët kanë përgjegjësi të bëjnë të qartë qëndrimin e tyre, arsyetimin juridik dhe pasojat e vendimit që do të marrin.
Në fund, rëndësi nuk ka vetëm arritja e një marrëveshjeje ndërmjet partive, por transparenca e saj dhe përgjegjësia e secilit deputet për votën që do të japë. Sepse përballë një çështjeje që prek drejtpërdrejt raportin e Kosovës me drejtësinë ndërkombëtare dhe mbrojtjen e të drejtave të të akuzuarve, shtyrjet nuk e zëvendësojnë dot vendimmarrjen institucionale.

Kontrolloni gjithashtu

Ali Ahmeti i kundërpërgjigjet Kurtit: Deklarata për gjuhën shqipe na ka goditur në shpirt, ka lënduar edhe ish-ushtarët e UÇK-së

Kryetari i Bashkimit Demokratik për Integrim, Ali Ahmeti, ka shpërthyer në kritika ndaj kryeministrit të …