Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Kryetari i OVL-UÇK-së, Hysni Gucati, ka njoftuar për ndarjen nga jeta të Ali Ngucatit, të cilin e ka kujtuar si luftëtar të orëve të para dhe bashkëudhëtar të Komandantit Legjendar Adem Jashari. Në një dedikim emocionues të publikuar në Facebook, Gucati ka vlerësuar jetën, veprën dhe kontributin e të ndjerit për atdheun, duke theksuar se figura të tilla mbeten pjesë e pashlyeshme e historisë së Kosovës. Ai e ka përshkruar Ali Ngucatin si një burrë me karakter fisnik, trimëri dhe dashuri të palëkundur për vendin, ndërsa ka shprehur nderimin për sakrificën dhe angazhimin e tij. “Sot Kosova humbi një nga shtyllat e saj më të forta. U nda nga jeta Ali Ngucati, burrë trimash, luftëtar i orëve të para e bashkëudhëtar i Komandantit Legjendar Adem Jashari”, ka shkruar Gucati. Ai ka theksuar se kontributi i njerëzve që u angazhuan për lirinë e Kosovës nuk harrohet, por mbetet i gdhendur në kujtesën historike dhe kombëtare. Në fund të mesazhit të tij, Gucati i ka dhënë lamtumirën të ndjerit me fjalë nderimi, duke vënë në pah sakrificën e tij për lirinë dhe pavarësinë e vendit. “Të qoftë i lehtë dheu i Kosovës, o Trim. Lavdi të përjetshme jetës, veprës dhe kontributit tënd, Kosova të kujton me nderime!”, ka përfunduar ai.
