Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Deputetja e Partisë Demokratike të Kosovës, Ariana Musliu-Shoshi, ka kritikuar ashpër paraqitjen e ministrit të Punëve të Jashtme dhe Diasporës, Glauk Konjufca, në mbledhjen e Këshillit të Sigurimit të Organizatës së Kombeve të Bashkuara, duke e cilësuar të pamjaftueshme qasjen e tij ndaj aktgjykimit të shkallës së parë kundër ish-krerëve të Ushtrisë Çlirimtare të Kosovës. Në një reagim publik, Musliu-Shoshi ka vlerësuar se Konjufca nuk e kundërshtoi me forcën e duhur vendimin e Hagës, por u mjaftua me konstatimin se aktgjykimi përmban gabime faktike dhe përmbajtjesore. Ajo ka kritikuar gjithashtu mungesën e përmendjes së kontributit të Hashim Thaçit, Kadri Veselit, Jakup Krasniqit dhe Rexhep Selimit në çlirimin, pavarësinë dhe shtetndërtimin e Kosovës. “Asnjë fjalë për rolin e Hashim Thaçit, Kadri Veselit, Jakup Krasniqit e Rexhep Selimi në çlirimin, pavarësinë dhe shtetndërtimin e Kosovës! Dhe këtë qasje e dëgjuam pikërisht nga njeriu që është caktuar ta udhëheqë strategjinë shtetërore për Hagën! Nëse në Këshillin e Sigurimit nuk artikulohet fuqishëm kundërshtimi ndaj këtij aktgjykimi, ku dhe kur do të artikulohet?”, ka shkruar Musliu-Shoshi. Sipas deputetes së PDK-së, kundërshtimi i asaj që ajo e cilëson padrejtësi nuk duhet të mbetet vetëm në nivelin e deklaratave diplomatike formale, por kërkon qëndrim të qartë dhe përfaqësim më të fuqishëm të interesave të Kosovës në arenën ndërkombëtare.
