Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Kryeministri i Shqipërisë, Edi Rama, ka refuzuar thirrjet e protestuesve për dorëheqje, duke këmbëngulur se legjitimiteti për të folur në emër të popullit buron nga vota dhe jo nga protestat në rrugë. Në reagimin e tij për protestat që po kërkojnë largimin e tij nga pushteti, Rama i ka cilësuar protestuesit si një “mishmash”, duke vënë në pikëpyetje të drejtën e tyre për të pretenduar se përfaqësojnë vullnetin e shumicës së qytetarëve. Kreu i qeverisë shqiptare ka kritikuar gjithashtu gjuhën e përdorur nga protestuesit, duke e paraqitur atë si të papajtueshme me standardet e komunikimit dhe dialogut demokratik. “Ky mishmash s’ka asnjë lidhje me popullin dhe asnjë autorizim për të folur në emër të popullit, sepse populli flet vetë me votën e tij”, ka deklaruar Rama. Ai ka theksuar se e drejta për të shprehur bindjet politike nuk duhet të shndërrohet në imponim ndaj të tjerëve, duke mbrojtur qëndrimin se protestat nuk mund të zëvendësojnë vendimin e qytetarëve përmes zgjedhjeve. Megjithatë, përballë kërkesave për largimin e tij, Rama nuk ka lënë hapësirë për paqartësi rreth qëndrimit të tij politik. Ai ka bërë të ditur se do të vazhdojë ta ushtrojë detyrën deri në përfundimin e mandatit. “Unë jam dhe do të jem në krye të detyrës sime deri në ditën e fundit me njerëzit e zakonshëm të Shqipërisë”, ka thënë kryeministri.
