Aleanca Kosova e Re

AKR-ja vlerëson se emërimi i anëtarëve të KQZ-së është një çështje e rëndësishme për Republikën e Kosovës

Aleanca Kosova e Re vlerëson se emërimi i anëtarëve të Komisionit Qendror të Zgjedhjëve (KQZ) është një çështje e rëndësishme për Republikën e Kosovës. Vonesat e deritanishme për emërimin e anëtarëve të KQZ-së nga ana e Presidentit të Republikës së Kosovës kanë qenë të pa arsyeshme, në kundërshtim me funksionin kushtetues të tij, sepse i njëjti garanton funksionimin demokratik dhe kushtetues të Institucioneve të Republikës së Kosovës. Neni 139 i Kushtetutës së Republikës së Kosovës, është i qartë sa i përket emërimit të anëtarëve të KQZ-së dhe mënyrës së propozimit të tyre nga ana e grupeve parlamentare. Pas Vendimit të fundit të Gjykatës Kushtetuese, në rastin Nr. K079/18, datë 03.12.2018, që ka të bëjë me nenin 139.4 të Kushtetutës tani i mbetet Presidentit që të bëjë interpretimin lidhur me atë se çka konsiderohen grupe parlamentare në Kuvendin e Republikës së Kosovës dhe se kush ka të drejtë të propozojë anëtarë të KQZ-së, në këtë situatë juridike në të cilën gjendemi.

Bazuar në logjikën e nenit 139 të Kushtetutës si dhe Aktgjykimin e Gjykatës Kushtetuese në rastin Nr. KO119/14, datë 26.08.2014, Aleanca Kosova e Re (AKR), ka bërë propozimin e saj për anëtar të KQZ-së, duke pasur parasysh që është regjistruar në seancën konsitiuive të Kuvendit, si grup parlamentar së bashku me LDK-në dhe se si e tillë ka marrë pjesë në koalicion parazgjedhor dhe është regjistruar në fletëvotime, ashtu siç e përcakton edhe Aktgjykimi i Gjykatës Kushtetuese në rastin Nr. KO119/14, datë 26.08.2014. Gjithnjë sipas këtij Aktgjykimi, grupe parlamentare njihen vetëm ato të cilat si të tilla dalin nga dokumentacioni i certifikuar i zgjedhjeve, në këtë rast në zgjedhjet e vitit 2017, LDK-AKR, kanë qenë të certifikuara në këtë mënyrë dhe po në këtë mënyrë edhe kanë marrë pjesë në seancën e parë (konstituive) të kësaj legjislature. Këtë logjikë të interpretimit, se grupet parlamentare, si të tilla dalin vetëm nga dokumentacioni i zgjedhjeve dhe seanca konstituive e Kuvendit, e dëshmojnë edhe veprimet e fundit të Presidentit të Republikës së Kosovës, si dhe ftesat e bëra nga ai, për grupet parlamentare, sipas mënyrës se si janë certifikuar në zgjedhje.

AKR, i rikujton presidentit që ka qenë pjesë e koalicionit parazgjedhor me LDK dhe si e tillë edhe është paraqitur në seancën konstituive. Kjo nënkupton që edhe AKR, si pjesë e këtij koalicioni parazgjedhor ka të drejtë të propozojë anëtarin e saj në KQZ, në emër të koalicionit parazgjedhor me LDK-në, gjë të cilën edhe e ka bërë, me shkresën dërguar Presidentit, me datë 27.12.2018, ku e propozuar për anëtare të KQZ-së nga AKR, si pjesë e koalicionit parazgjedhor është Znj. Myzejene Selmani.

Bazuar në logjikën e interpretimit të grupeve parlamentare, sipas seancës konstituive, Presidenti i Republikës së Kosovës duhet që të marrë për bazë propozimin e secilës parti, për emërim të anëtarëve të KQZ-së, që ka qenë pjesë e koalicionit parazgjedhor, sikur është rasti i AKR-së dhe LDK-së. Grupet parlamentare nuk duhet të shihen sipas fuqisë aktuale në parlament por sipas Kushtetutës dhe Ligjit.

Bazuar në faktet e përmendura më sipër, AKR ka të drejtë kushtetuese të ketë anëtarin e saj në KQZ, sepse ka qenë pjesë e koalicionit parazgjedhor me LDK-në dhe në këtë mënyrë edhe është certifikuar në rezultatet përfundimtare të zgjedhjeve të vitit 2017.

Secila praktikë tjetër që do të krijohet nga presidenti në emërimin e anëtarëve të KQZ-së, duke mos marrë parasysh kërkesat e subjekteve politike, sikur rasti i AKR-së, është një praktikë kundër kushtetuese dhe që bie në kundërshtim me vetë funksionin e Presidentit si dhe rolin e tij unifikues dhe garantues të funksionimit demokratik të institucioneve të Republikës së Kosovës.

Kontrolloni gjithashtu

Bedri Hamza është shprehet optimist se do ta fitojë garën për kryetar të Mitrovicës pa balotazh

Bedri Hamza shfaq dyshime lidhur me komunikimin e njërit prej organizatorëve të sulmit në veri të Kosovës me Mimoza Kusarin

Kryetari i Mitrovicës, Bedri Hamza, ka ngritur një zë kritik në lidhje me dialogun me …