Ambasadorja, Yuri Kim, tërë kohën së bashku me Edi Ramën, duke injoruar Ilir Metën në takim me “Defender Europe 2021”

Ambasadorja, Yuri Kim, tërë kohën së bashku me Edi Ramën, duke injoruar Ilir Metën në takim me “Defender Europe 2021”

Ambasadorja amerikane Yuri Kim dhe Presidenti Ilir Meta janë përballur për herë të parë bashkë pas sulmeve politike që kanë pasur ndaj njëri-tjetrit para zgjedhjeve të 25 prillit. Në kuadër të nisjes së stërvitjes më të madhe ushtarake “Defender Europe 2021”, Yuri Kim ka zgjedhur që ta anashkalojë  Ilir Metën dhe ka qëndruar gjatë gjithë kohës pranë kryeministrit Rama. Madje edhe në një udhëtim me anije në brigjet e Adriatikut, Kim dhe Rama duken shumë të afërt me njëri-tjetrin teksa bisedojnë dhe qeshin së bashku.

Përveç Ramës dhe Kim, në anije ishin dhe disa prej ushtarakëve amerikanë, si dhe ministra të qeverisë Rama, si Çuçi apo Xhaçka. Në Durrës gjatë ditës së sotme ishte dhe presidenti i vendit Ilir Meta dhe kreu i Kuvendit Gramoz Ruci.

Një takim mes ambasadores amerikane dhe Presidentit Meta u shmang në këtë takim të ditës së sotme, ndërsa kujtojmë se përplasjet mes tyre ishin të ashpra. Meta akuzoi ambasadoren se po ndërhynte në punët e brendshme të Shqipërisë, e madje e kishte kërcënuar atë përmes telefonatave.

Derisa Ilir Meta u kërkonte qytetarëve që të “mprihnin sëpatat e sfurqet” për të mbrojtur votën në 25 Prill, ambasadorja amerikane i kërkoi të ndalet duke i cilësuar të papranueshme deklaratat.

Në një postim në rrjetet sociale, ambasadorja e SHBA shton se ata që nxisin dhunë do të mbajnë përgjegjësi për rezultatet e fjalëve dhe veprimeve të tyre.

“Është e papranueshme për këdo që të kërcënojë se qytetarët do të marrin “sfurqet” në 25 Prill ose nëse nuk u pëlqen rezultati i zgjedhjeve. Këto kërcënime meritojnë dënim. Ata që nxisin dhunë do të mbajnë përgjegjësi për rezultatet e fjalëve dhe veprimeve të tyre. Ndal!” shkroi Kim.

I menjëhershëm ishte reagimi i Presidentit Ilir Meta i cili nga një studio televizive i është përgjigjur që të mos mbështesë më Ramën dhe të mos ndërhyjë më në punët e brendshme të Shqipërisë.

“Tani live sapo më shkruajti Ambasadorja Yuri Kim për të mos përmendur më sfurqet. I them Ambasadores amerikane live që të mos marrë më në mbrojtje Edi Ramën. Meqë më dërgoi live sms i them Ambasadores Amerikane mos e mbështet me Edi Ramën. Meqë jam transparent po ju them edhe një fakt që Ambasadorja Amerikane më ka kërkuar mua si President, një ditë para mbledhjes së KED-së të pranoj unë Adrian Dvoranin. Këtë ajo e kërkoi jo në emër të Amerikës, po në emër të Edi Ramës. E përqafoj ambasadoren amerikane dhe i them boll ndërhyre në punët e brendshme të Shqipërisë në këtë mënyrë të njëanshme. Deklarata e Yuri Kim është një turp dhe e ftoj Ambasadoren të vijë tani live në studio bashkë me Edi Ramën të ballafaqohemi para shqiptarëve”. (TCH)

Kontrolloni gjithashtu

Besnik Fahredin Hoti: TË MOS HARROJMË KURRË!

(25 vite nga tragjedia dhe gjenocidi serb në Krushë të Madhe)    Në përkujtim dhe …