Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Basri Beka, nuk ishte ideator as themelues i Radios-Kosova e Lirë, sikur shkruan gazeta e quajtur “Epoka e Re”, por një luftëtar i lirisë i cili e ka bartur mbi supe një pjesë apo ndonjë antenë të teknikës së Radios, ashtu sikur dhjetëra të tjerë.
Basriu, mbase as pas 22 viteve ende nuk e di se Radio-Kosova e Lirë është themeluar me vendim të SHP të UÇK-së, më 13 nëntor të vitit 1998. Se stafi i Radios dhe i Agjencisë ka bërë përgatitjet paraprake, qysh prej verës së vitit 1998, fillimisht në fshatin Krojmir, pastaj në fshatin Berishë.
“Feniksit” mund t’i duket vetja feniks edhe sot, por realiteti për Radion-Kosova e Lirë dhe Agjencinë Kosovapss dihet publikisht që nga 4 janari i vitit 1999. Këtë e di jo vetëm Kosova, por tërë bota.
Pretendimet e tilla për përvetësim dhe me përpjekje për dalje nga anonimiteti, nuk i bëjnë nder një luftëtari të lirisë, puna e të cilët është çmuar në mbartjen deri në Berishë, apo në Fshatin e Ri të një pjese të teknikës transmetuese, ashtu sikur kanë bërë edhe shumë të tjerë, sidomos Shaqir Shaqiri, Bekim Haxhiu e të tjerë, të cilët i kanë kryer urdhrat e eprorëve të tyre.
Ky pretendim është më shumë se qesharak dhe nuk do të merremi më shumë me këtë “shpikje” pas 22 viteve, sepse është kryekreje i paqëndrueshëm, naiv dhe krejtësisht jashtë realitetit të kohës.
Nuk është aspak e ndershme nga “feniksi” që dëshmitarë të vetëm për ato që pretendon i ka radhitur katër veprimtarë tani të vdekur, sikur janë Muhamet Mehmeti, Bedri Rama, Islam Berisha dhe Sylejman Gashi. Ata nuk mund të dëshmojnë tani, asgjë për ideatorin dhe “themeluesin”, apo dhe bartësin e teknikës së Radios, sepse teknika është mjet për transmetimin e programit. Këtë të paktën duhet ta kishte kuptuar apo e kupton tani Basri Beka. Krejt kjo flet qartë se manipulimet e tilla bëhen me qëllim të diskreditimit të vlerave të luftës, pikërisht në kohën kur ka filluar punën Gjykata Speciale, ndoshta edhe pa qëllim.
Dhe për fund, Basri Beka, nuk i ka treguar lexuesit se cilat punë apo vepra të tjera madhore i ka bërë gjatë kohës së luftës, përveç bartjes së teknikës, apo ndonjë pjese të saj.
