Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Komisioni Evropian ka publikuar Raportin për Kosovën për vitin 2026, në kuadër të Paketës Vjetore të Zgjerimit, duke paraqitur vlerësimin për zhvillimet politike, ekonomike dhe institucionale, si dhe për përmbushjen e reformave në rrugën drejt integrimit evropian. Raporti është pjesë e vlerësimit vjetor të vendeve që synojnë anëtarësimin në Bashkimin Evropian dhe përmban rekomandime për institucionet e Kosovës lidhur me hapat që duhet të ndërmerren në periudhën e ardhshme. Paketën e Zgjerimit për vitin 2026 para Komisionit për Punë të Jashtme të Parlamentit Evropian (AFET) e prezanton komisionarja për Zgjerim, Marta Kos. Vëmendje të veçantë në raportin për Kosovën zënë funksionimi i institucioneve demokratike, sundimi i ligjit, pavarësia e gjyqësorit, lufta kundër korrupsionit, zhvillimi ekonomik dhe normalizimi i marrëdhënieve me Serbinë. Në vlerësimin për sistemin e drejtësisë, Komisioni Evropian konstaton mungesë progresi, duke paralajmëruar se ndikimi i interesave politike dhe ekonomike vazhdon të pengojë pavarësinë dhe paanshmërinë e gjyqësorit. Raporti trajton gjithashtu ngecjet në reformat ligjore, funksionimin e institucioneve të drejtësisë dhe zhvillimet lidhur me Dhomat e Specializuara të Kosovës. Pas publikimit të dokumenteve, raportuesit e Parlamentit Evropian pritet të hartojnë projektrezoluta të veçanta për vendet e përfshira në Paketën e Zgjerimit, përmes të cilave do të paraqesin qëndrimet dhe rekomandimet e tyre për procesin e integrimit evropian.
