Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Pas miratimit në Kuvendin e Kosovës të ndryshimeve në Ligjin për Dhomat e Specializuara, organizatori i protestave 21-ditore, Çlirim Haziri, iu drejtua qytetarëve të mbledhur në sheshin e Prishtinës me një fjalim emocional. Haziri e cilësoi votimin e ligjit si rezultat të drejtpërdrejtë të presionit dhe këmbënguljes së qytetarëve, të cilët për 21 ditë me radhë protestuan duke kërkuar nga institucionet miratimin e ndryshimeve ligjore. “Fitorja e sonte është e madhe, por ky është vetëm fillimi i angazhimit tonë të pandalshëm qytetar në mbrojtje të Republikës”, tha Haziri para masës protestuese. Duke iu drejtuar drejtpërdrejt protestuesve, ai theksoi se miratimi i ligjit, sipas tij, nuk erdhi si rezultat i një vullneti të vetë politikës, por i qëndrimit të qytetarëve në shesh. “Ky ligj nuk na u fal. Ky ligj nuk kaloi nga dëshira e atyre aty brenda. Ky ligj u fitua këtu jashtë. U fitua nga ju”, deklaroi ai. Haziri tha se miratimi i ligjit nuk duhet të shihet si përfundim i angazhimit qytetar, duke paralajmëruar vazhdimin e presionit për zbatimin e tij dhe për çështjet që lidhen me ish-krerët e UÇK-së që po gjykohen në Hagë. “Ky votim sonte nuk është asnjë mrekulli. Ai është thjesht një borxh i vonuar, një detyrim minimal që ky shtet e kishte ndaj atyre që i dhanë jetën”, u shpreh ai. Në fjalimin e tij, Haziri përmendi edhe emrat e dëshmorëve të UÇK-së, ndërsa tha se përkrahësit e protestës do ta vazhdojnë angazhimin edhe pas votimit të ligjit. “Mendja dhe zemra jonë mbeten atje, në Hagë”, tha ai, duke iu referuar proceseve gjyqësore ndaj ish-drejtuesve të UÇK-së. Në fund, Haziri falënderoi qytetarët për pjesëmarrjen gjatë 21 ditëve të protestave dhe e përmbylli fjalimin me thirrjen: “Rroftë Ushtria Çlirimtare e Kosovës!”
