Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Organizata e Veteranëve të Luftës së UÇK-së ka publikuar agjendën e aktiviteteve për shënimin e Epopesë së UÇK-së, duke ftuar familjet e dëshmorëve, bashkëluftëtarët dhe qytetarët që të marrin pjesë në ceremonitë përkujtimore. Sipas njoftimit të OVL-UÇK-së, aktivitetet do të zhvillohen më 6 dhe 7 mars, me homazhe dhe aktivitete simbolike në nderim të sakrificës së dëshmorëve dhe luftës për liri. Më 6 mars, në ora 09:30, do të mbahen homazhe te Kompleksi Memorial në Prekaz, ndërsa në ora 10:00 homazhe do të zhvillohen edhe te Kompleksi Memorial në Marinë. Në të njëjtën kohë, homazhe do të organizohen nga strukturat e dala nga lufta e UÇK-së në të gjitha komplekset memoriale në vend, në nderim të dëshmorëve dhe të rënëve për lirinë e Kosovës. Ndërkaq, më 7 mars, në ora 18:00, do të mbahet aktiviteti tradicional “Nata e Zjarreve”, ku do të ndizën zjarre simbolike në shtatë ish-zonat operative të UÇK-së. Ky aktivitet simbolizon qëndresën, sakrificën dhe përkujtimin e luftës çlirimtare. Organizata e Veteranëve të Luftës së UÇK-së ka bërë thirrje që qytetarët të marrin pjesë në këto aktivitete për të nderuar dëshmorët dhe për të përkujtuar një nga ngjarjet më të rëndësishme të historisë së Kosovës.
