Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Kryetari i Nismës Socialdemokrate, Fatmir Limaj, ka kritikuar ashpër gjuhën e përdorur në skenën politike të Kosovës, duke e cilësuar Kuvendin si joserioz dhe debatin publik si të mbushur me fyerje, shpifje e gjuhë të dhunshme. Limaj tha se gjuha e përdorur në Parlament dhe në debatet politike ka ndikuar në krijimin e një klime negative, e cila, sipas tij, është bartur edhe në familjet kosovare. “Në tryezat tona, nga Parlamenti, në debate e diskutime, kemi shfrenuar gjuhën. Jepet mikrofoni me një fjalor që ka dhunë, shpifje, fyerje”, deklaroi Limaj. Ai vlerësoi se kjo klimë nuk ka mbetur vetëm brenda institucioneve, por është përhapur edhe në shoqëri, duke e bërë gjuhën e ashpër pjesë të komunikimit të përditshëm. Megjithatë, kritika ndaj degradimit të debatit publik ngre edhe çështjen e përgjegjësisë së vetë politikanëve. Përtej deklaratave dhe shqetësimeve, qytetarët presin që përfaqësuesit e tyre të dëshmojnë me sjellje se debati politik mund të zhvillohet pa fyerje, akuza të pabazuara dhe gjuhë përçarëse. Sepse kur politika e humb seriozitetin, pasojat nuk mbeten vetëm në Kuvend, por prekin edhe besimin e qytetarëve në institucione.
