Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Ish deputeti, Hisen Berisha, ka kritikuar ashpër Deklaratën e miratuar nga Kuvendi i Kosovës në lidhje me aktgjykimin e Dhomave të Specializuara, duke e cilësuar atë si një veprim politik pa efekt juridik. Berisha ka argumentuar se deputetët, në vend të një deklarate, do të duhej të ndërmerrnin hapa institucionalë për zhbërjen e Dhomave të Specializuara, ndërsa ka bërë dallim mes përgjegjësisë së Kuvendit për votën dhe asaj të Qeverisë për zbatimin e vendimeve. Sipas tij, 99 deputetët që votuan deklaratën duhej ta shfrytëzonin vullnetin politik për veprim konkret, ndërsa ka ngritur pyetjen se ku ishte Qeveria dhe cili ishte qëndrimi i saj institucional ndaj kësaj çështjeje. Berisha ka kritikuar veçanërisht atë që e quan “politikë deklarative”, duke thënë se me deklarata nuk ndryshohet realiteti juridik i proceseve në Hagë. “UÇK-ja nuk mbrohet me deklarata që nuk e ndryshojnë realitetin juridik. UÇK-ja nuk mbrohet me deklarata që e zgjasin jetën e mekanizmit që e gjykon atë. Ajo mbrohet me veprim shtetëror”, ka shkruar Berisha. Në fund, ai ka shprehur shqetësimin se, sipas këndvështrimit të tij si ushtarak dhe nga prizmi i sigurisë, një qasje e tillë mund të krijojë terren për tensione të reja dhe të trimërojë forcat nacionaliste në Serbi.
