Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Vendimi i Bordit të Zyrës së Rregullatorit për Energji që humbjet e energjisë elektrike që shkojnë miliona euro t`u faturohen konsumatorëve, ka ngjallur reagime nga shoqëria civile. Ky vendim konsiderohet i dëmshëm për qytetarët dhe i papërgjegjshëm nga një bord që po i mbron vetëm interesat e biznesit. Shoqatat që mbrojnë konsumatorët kërcënojnë edhe me protesta, nëse vendimi nuk shfuqizohet. Vendimin e fundit të Zyrës së Rregullatorit të Energjisë që humbjet e energjisë elektrike në rrjetin e KEDS-it, t`u faturohen konsumatorëve, KMLDNJ e konsideron joligjor, të turpshëm dhe të papranueshëm. Edhe kryetari i shoqatës ‘Konsumatori’, Selatin Kaçaniku, tha se mbulimi i vjedhjeve në rrjetin e KEDS-it, nuk ka asnjë kuptim, sepse qytetari nuk ka asnjë fije përgjegjësie për to. Kundër vendimit të ZRRE-së ka reaguar edhe Konsorciumi Kosovar për Zhvillim të Qëndrueshëm. Sipas këtij konsorciumi ZRRE ka shkelur mandatin për të mbrojtur interesin publik dhe duke përdorur me arbitraritet pushtetin e vet, ka vendosur t’ia faturojë humbjet e një kompanie private, të gjithë qytetarëve të Kosovës. Zyrtarë të KEDS-it thonë se humbjet e energjisë elektrike, qofshin ato teknike dhe vjedhje, viteve të fundit janë faturuar ndaj konsumatorëve të përgjegjshëm të KEDS-it, dhe do të vazhdojnë të faturohen edhe më tej, sepse sipas tyre, kjo është normale dhe ndodh në çdo vend të botës.
