Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Ish-kryetari i Kuvendit të Kosovës dhe njëri nga themeluesit e partisë Nisma për Kosovën, Jakup Krasniqi, ka akuzuar kryeministrin, Isa Mustafa dhe kryetarin, Hashim Thaçi, që sipas tij, me politikën e tyre të negociatave mundësuan vendosjen e shtatores së Car Llazarit. Në një shkrim autorial, Krasniqi ka përkujtuar se për bisedimet me Serbinë thuhej se bëheshin për normalizimin e marrëdhënieve me Serbinë dhe integrimin e serbëve në institucionet e Kosovës, por asnjëra nga këto nuk ndodhi. Sipas tij, çdo ditë e më tepër po ndodh ndarja e sovranitetit me Serbinë dhe forcimi i Listës serbe e cila po punon për jetësimin e Bashkësisë së Komunave serbe në Kosovë. “Heshtja e Qeverisë dhe e koalicionit qeverisës, për vendosjen e Përmendores së Car Llazarit në Mitrovicë, është heshtje për shkak të marrëveshjeve të arritura në Bruksel. Kjo është një dëshmi tjetër, se këta njerëz që kanë lejuar e lejojnë gjëra të tilla kundër Kushtetutës e ligjeve, duhet të dorëhiqen. Dorëheqjen këta njerëz duhet ta afronin po të kishin moral e përgjegjësi politike, sikur pozitat që i mbajnë, t’i mbanin për publikun e jo vetëm për veten e tyre. Kjo praktikë qeverisëse duhet të ndërpritet! Pa ndërprerjen e kësaj qeverisje, rrënimi i institucioneve të shtetit nuk do të ketë ndalje!”, përfundon shkrimi i përfaqësuesit të Nismës, Jakup Krasniqi.
