MIT KS
Fillimi / Institucionet / Kuvendi i Komunës së Hanit të Elezit me “Deklaratë për mbrojtjen e vlerave të luftës së Ushtrisë Çlirimtare të Kosovës”

Kuvendi i Komunës së Hanit të Elezit me “Deklaratë për mbrojtjen e vlerave të luftës së Ushtrisë Çlirimtare të Kosovës”

Kuvendi i Komunës së Hanit të Elezit mbanë mbledhjen e pestë të rregullt për vitin 2020.

Kuvendi për rendë të ditës shqyrtoi;

  1. Miratimi i procesverbalit nga mbledhja e kaluar.

  2. Situata me gjendjen e pandemisë së Koronavirusit

  3. Miratimi i raportit të shpenzimeve buxhetore për periudhën Janar-Qershor 2020.

  4. Shqyrtimi i raportit të auditimit të brendshëm i Komunës së Hanit të Elezit.

  5. Shqyrtimi i planit të veprimit për zbatimin e rekomandimeve të auditimit të brendshëm nga Komuna e Hanit të Elezit.

  6. Themelimi i grupit punues për hartimin e planit të punës së Kuvendit të Komunës për vitin 2021.

  7. Shqyrtimi i informatës mbi raportin financiar për gjashtëmujorin e N.P.L “Pastrimi”sh.a.

  8. Njoftim mbi aktivitetin e Këshillit Komunal për Siguri në Bashkësi për gjashtë mujorin e vitit 2020.

  9. Të ndryshme

Me punën e këshillit udhëhoqi kryesuesi i kuvendit të komunës Qamush Brava, ndërsa në emër të ekzekutivit ishte prezent kryetari i komunës Rufki Suma dhe drejtorët e drejtorive përkatëse. Kuvendi i Komunës së Hanit të Elezit, me pajtimin e të gjitha grupeve të këshilltarëve njëzëri miratoi:

“Deklaratën për mbrojtjen e vlerave të luftës së Ushtrisë Çlirimtare të Kosovës”

D E K L A R A T Ë

  1. Konfirmojmë qëndrimin tonë dhe bindjen e paluhatshme se lufta mbrojtëse e qytetarëve të Kosovës, e udhëhequr nga Ushtria Çlirimtare e Kosovës, dhe e përkrahur nga forcat e NATO-së, ishte luftë e drejtë dhe e pastër për çlirimin e Kosovës kundër regjimit gjenocidal të Sllobodan Millosheviqit, forcave ushtarake, policore e paramilitare të Serbisë në Kosovë.

  2. Vlerësojmë të paprecedent veprimin e Zyrës së Prokurorit të Specializuar për të publikuar njoftimin për një aktakuzë të pakonfirmuar nga Gjyqtari i procedurës paraprake ndaj dy prej liderëve kryesorë të Ushtrisë Çlirimtare të Kosovës, Hashim Thaçi dhe Kadri Veseli.

  3. Shprehim shqetësimin se ky veprim i Zyrës së Prokurorit të Specializuar përbën edhe shkelje të të drejtave të njeriut, si dhe është në kundërshtim të plotë me parimin themelor të drejtësisë, atë të prezumimit të pafajësisë.

  4. Ritheksojmë se lufta mbrojtëse e UÇK-së ka qenë e drejtë dhe do të mbetet përherë e tillë. Ajo nuk mund të njolloset asnjëherë. Bashkësia ndërkombëtare duhet ta çmojë lart bashkëpunimin e institucioneve kosovare dhe ish-pjesëtarëve të UÇK-së me institucionet e drejtësisë ndërkombëtare përgjatë këtyre njëzet vjetëve, përfshirë Dhomat e Specializuara. Në gjithë këto procese është dëshmuar pastërtia e luftës së popullit shqiptar për liri e pavarësi.

  5. Njohim dhe vlerësojmë lart sakrificën, angazhimin dhe kontributin e Ushtrisë Çlirimtare të Kosovës, të mbështetur nga NATO, e të udhëhequr nga SHBA-të dhe aleatet e saj, për lirinë dhe pavarësinë e Kosovës. Solidarizohemi dhe shprehim njëzëri mbështetjen e plotë për Hashim Thaçi dhe Kadri Veseli, të cilët janë ndër themeluesit dhe udhëheqësit e Ushtrisë Çlirimtare të Kosovës, dhe shprehim besimin e palëkundur për pafajësinë e tyre.

  6. I konsiderojmë përpjekje të padrejta dhe të rrezikshme, por të parealizueshme, tendencat për ta kriminalizuar luftën e drejtë dhe të lavdishme të popullit të Kosovës për liri dhe pavarësi. Refuzojmë çfarëdo përpjekje për ta etiketuar UÇK-në si agresore;

  7. E vërteta për historinë e popullit shqiptar nuk mund të deformohet dhe as të tjetërsohet nga ata që pretendojnë për t’i barazuar viktimat me kryesit e krimeve serbe. Kosovën nuk mund ta dobësojë askush dhe të ardhmen e saj euroatlantike nuk mund ta devijojë dhe as ta ndalë asnjë përpjekje.

  8. Si përfaqësues të qytetarëve, të zgjedhur në mënyrë demokratike, bëjmë thirrje për unitet mes njerëzve dhe bashkërendim të angazhimeve ndërmjet partive politike për të ruajtur shtetin e Kosovës, vlerat e luftës dhe pastërtinë e Ushtrisë Çlirimtare të Kosovës.

Kontrolloni gjithashtu

Islamic Relief Kosova ndihmon familjet me nevojë të Komunës së Hanit të Elezit

121 pako me nga 7 kg mish është kontributi humanitarë i radhës i Islamic Relief ...