Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Lidhja Demokratike e Kosovës ka sinjalizuar gatishmërinë për t’iu rikthyer bisedimeve me Lëvizjen Vetëvendosje për formimin e institucioneve të reja, megjithatë përçarjet e thella brenda partisë vazhdojnë të hedhin dyshime mbi mundësinë e arritjes së një marrëveshjeje politike. Nënkryetari i LDK-së, Lufti Haziri, ka deklaruar se në Kuvendin e partisë, të mbajtur më 30 korrik, është arritur pajtim në parim që LDK-ja të marrë pjesë në procesin e bashkëpunimit për ndërtimin e institucioneve dhe për të shmangur një cikël të ri zgjedhjesh. Sipas tij, vendimi i Kuvendit të LDK-së konfirmon gatishmërinë e partisë për të dhënë kontribut në tejkalimin e bllokadës institucionale. Megjithatë, zhvillimet e fundit brenda LDK-së tregojnë se uniteti mbetet i brishtë. Bisedimet me LVV-në ishin pezulluar më 15 korrik, pasi një pjesë e zyrtarëve të partisë kërkuan shkarkimin e kryetarit Lumir Abdixhiku për shkak të pakënaqësive me rezultatin zgjedhor. Edhe pse Abdixhiku e mbijetoi mocionin, ndarjet e brendshme vazhdojnë të jenë të dukshme. Kjo situatë e bën të pasigurt nëse të 18 deputetët e LDK-së do të mbështesin një marrëveshje eventuale me LVV-në, veçanërisht duke pasur parasysh se disa prej tyre votuan kundër vazhdimit të mandatit të Abdixhikut në krye të partisë.
Burimi: Radio Evropa e Lirë.
