Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Sekretari i Përgjithshëm i NATO-s, Mark Rutte, ka deklaruar se KFOR-i do të vazhdojë të jetë i pranishëm në Kosovë dhe të kontribuojë në ruajtjen e paqes dhe stabilitetit, edhe në prag të shpalljes së aktgjykimit nga Gjykata Speciale në Hagë për katër ish-krerët e Ushtrisë Çlirimtare të Kosovës. I pyetur nga një gazetar për zhvillimet që priten këtë javë, Rutte tha në një konferencë për media në selinë e NATO-s në Bruksel se prania e KFOR-it në Kosovë nuk varet nga zhvillimet e ditëve të ardhshme. “KFOR-i është aty. KFOR-i është aty për t’u siguruar që NATO-ja të vazhdojë të kontribuojë në stabilitet dhe paqe”, tha Rutte, duke theksuar se angazhimi i Aleancës synon të krijojë një mjedis të sigurt dhe të qëndrueshëm për të gjithë qytetarët e Kosovës. Ai shtoi se ky angazhim ka zgjatur për më shumë se dy dekada dhe lidhet edhe me krijimin e kushteve për zhvillim ekonomik e shoqëror. Rutte theksoi se KFOR-i do të vazhdojë të jetë në Kosovë pavarësisht se çfarë zhvillimesh apo lajmesh mund të ketë gjatë kësaj jave dhe në periudhën e ardhshme, duke nënvizuar se zotimi i NATO-s për paqen dhe sigurinë në Kosovë është afatgjatë. Sipas tij, Aleanca do të vazhdojë të vlerësojë edhe konfigurimin më të përshtatshëm të KFOR-it dhe mënyrën se si ai duhet të përshtatet me situatën në terren, duke marrë parasysh edhe ndikimin që zhvillimet në Kosovë mund të kenë në gjithë rajonin.
