Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Mërgata jonë në Zvicër e kujton me krenari Skënderbeun. LAPSH ’Naim Frashëri’, Kantoni i Argaut, organizoi simpoziumin shkencor ‘550-vjetori i vdekjes së Gjergj Kastriotit- Skënderbeut’. Simpoziumi u mbajt në Vindish, më 23.6.2018. Pas fjalës së mirëseardhjes nga Riza Demaj, kryetar i LAPSH-it, përshëndetjeve nga ambasadori, Ilir Gjoni, dhe ministri këshilltar, Mustafë Xhemajli, fjalën e hapjes e mbajti prof. dr. Frashër Demaj, anëtar korrespondent në ASHAK. Kumtuan profesorët dhe studiuesit nga Prishtina, Tirana e mërgata: prof. dr. Frashër Demaj, ‘Atakimi i figurës së Gjergj Kastriotit-Skënderbeut, tendencë antishqiptare’; msc. Shaban Arifaj, ‘Gjergj Kastrioti-Skënderbeu në shkrime publicistike-letrare’; prof. asoc. dr. Teki Kurti, ‘Gjergj Kastrioti –Skënderbeu, princ i Arbërisë (DominusAlbania)’; dr. sc. Vaxhid Sejdiu, ‘Figura e heroit kombëtar Gjergj Kastrioti-Skënderbeu në tekstet e shkollës shqipe’; prof. dr. Zymer Ujkan Neziri, ‘Gjergj Kastrioti-Skënderbeu në legjenda e në gojëdhëna popullore’. Interesimi ishte shumë i madh. Salla ishte përplot me të pranishëm. Me interes ishin edhe diskutimet e pjesëmarrësve: Ibish Neziri, Salih Z. Lajçi, Adem Osmani, Jakup Osmani, Xhevdet Muji, për: Skënderbeun në Prishtinë, 1448, Gazimestanin, mbrojtjen ligjore të figurës së Skënderbeut, arkivat e Stambollit, folklorin arbëresh etj. Fjalën e mbylljes e mbajti prof. dr. Zymer Ujkan Neziri. Pos simpoziumit, u shfaq edhe një dokumentar dhe një program i pasur kulturor-artistik, kushtuar Gjergj Kastriotit-Skënderbeut. Edhe të nesermen, në ditën e shkollës shqipe në Kantonin e Argaut, në sallën e mbushur përplot, si zakonisht, me nxënës e prindër, vazhdoi programi me këngë, valle e recitime të fëmijëve tanë në atë kanton. Dhe, Skënderbeu prapë ishte në qendër të vëmendjes, krahas gjuhës shqipe e flamurit kombëtar. Ata, të veshur në rroba kombëtare, vajza e djem, dëshmonin dashurinë e madhe që kanë për kryeheroin tonë, për të parët tanë dhe për traditën tonë të lashtë.
(Zymer U. Neziri)
