Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Ministria e Mbrojtjes ka sqaruar se Kosova nuk është ftuar në Samitin e NATO-s që po mbahet në Turqi, pasi nuk është shtet anëtar i aleancës dhe as pjesë e Programit të Partneritetit për Paqe. Në një përgjigje zyrtare, ministria ka theksuar se Kosova nuk ka marrë pjesë as më herët në samitet e NATO-s si shtet pjesëmarrës, përveç disa aktiviteteve të veçanta të organizuara në margjinat e tyre. Sipas sqarimit, samitet e NATO-s janë takime të krerëve të shteteve dhe qeverive të vendeve anëtare, si dhe të partnerëve që ftohen në raste të caktuara, ndërsa Kosova aktualisht nuk gëzon asnjërin prej këtyre statuseve. Ministria ka rikujtuar se gjatë samitit të vitit të kaluar, Kosova mori pjesë vetëm në një aktivitet të fushatës “Gratë, Paqja dhe Siguria”, të organizuar nga Departamenti i Shtetit i Shteteve të Bashkuara të Amerikës. Megjithatë, sipas Ministrisë së Mbrojtjes, institucionet e Kosovës mbeten të përkushtuara ndaj synimit strategjik për anëtarësim në NATO, duke vazhduar reformat dhe bashkëpunimin me aleancën dhe shtetet e saj anëtare.
