Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Organizata e Veteranëve të Luftës së UÇK-së, dega në Drenas, ka ndarë Mirënjohje postmortum për profesor Ahmet Qeriqin, në shenjë vlerësimi për kontributin e tij të çmuar në çështjen kombëtare dhe për vetëmohimin e jashtëzakonshëm në luftën e Ushtrisë Çlirimtare të Kosovës.
Profesor Ahmet Qeriqi ishte njëri ndër zërat më të njohur të luftës dhe informimit kombëtar. Nga themelimi i Radio Kosovës së Lirë, më 4 janar 1999, e deri më 7 mars 2025, kur ndërroi jetë, ai shërbeu si drejtues i saj, duke e bërë këtë institucion simbol të rezistencës, të së vërtetës dhe të lirisë së fjalës në kohët më të vështira për popullin shqiptar.
Përmes punës dhe përkushtimit të tij, ai dha një kontribut të veçantë në dokumentimin dhe transmetimin e ngjarjeve të luftës çlirimtare, duke ruajtur kujtesën historike dhe vlerat e sakrificës për liri. Veprimtaria e tij mbetet pjesë e rëndësishme e historisë së luftës së UÇK-së dhe e medias së lirë shqiptare.
Mirënjohja, e ndarë më 14 qershor 2026 në Drenas, përfaqëson respektin dhe nderimin për jetën, veprën dhe idealet e profesor Ahmet Qeriqit, duke dëshmuar se kontributi i tij për atdheun dhe për informimin e lirë do të mbetet i paharruar ndër breza.
Mirënjohjen e ndau nënkryetari i OVL-UÇK-së, dega në Drenas, Enver Hajdari, ndërsa atë e pranoi vajza e të ndjerit, Arbana Qeriqi.
Ky vlerësim është një dëshmi e respektit dhe mirënjohjes për figurën e profesor Ahmet Qeriqit, i cili me punën, përkushtimin dhe idealizmin e tij la gjurmë të pashlyeshme në historinë e luftës çlirimtare, të gazetarisë shqiptare dhe të Radio Kosovës së Lirë.
