Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Oda Ekonomike Amerikane në Kosovë u ka bërë thirrje institucioneve të reja që, pas konstituimit të Kuvendit dhe formimit të qeverisë, ta trajtojnë me prioritet përfshirjen e Kosovës në infrastrukturën rajonale të gazit të lëngshëm natyror amerikan (LNG).
Në reagimin e saj, Oda thekson se Kosova ndodhet në një moment vendimtar për të ardhmen e sektorit energjetik dhe se vendimet që do të merren në periudhën e ardhshme do të ndikojnë në sigurinë energjetike, zhvillimin ekonomik dhe konkurrueshmërinë e vendit.
Sipas Odës Amerikane, qasja në infrastrukturën rajonale të LNG-së amerikane do të mundësonte ndërtimin më të shpejtë të kapaciteteve të reja energjetike, diversifikimin e burimeve të furnizimit, rritjen e fleksibilitetit të sistemit elektroenergjetik dhe integrimin më efikas të burimeve të ripërtëritshme të energjisë.
Oda vlerëson se zhvillimi i kapaciteteve të reja energjetike nuk lidhet vetëm me prodhimin e energjisë elektrike, por edhe me sigurinë kombëtare, stabilitetin ekonomik dhe krijimin e një mjedisi më tërheqës për investime, duke theksuar se kjo qasje është në përputhje edhe me orientimin strategjik të Shteteve të Bashkuara të Amerikës dhe zhvillimet rajonale për forcimin e sigurisë energjetike.
