Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Nënkryetari i Organizatës së Veteranëve të Luftës së UÇK-së, Gazmend Syla, ka paralajmëruar se protestat mbeten një mundësi reagimi ndaj Gjykatës Speciale, nëse përpjekjet institucionale nuk sjellin rezultat. Syla ka kritikuar deklaratat e kryetares së Dhomave të Specializuara në Hagë, Ekaterina Trendafilova, duke theksuar se Gjykata Speciale nuk mund të qëndrojë mbi shtetin e Kosovës. Ai ka ngritur shqetësime për kohëzgjatjen e paraburgimit të të akuzuarve dhe për çështje që, sipas tij, cenojnë parimet e drejtësisë. Syla ka bërë të ditur se OVL-UÇK do të vazhdojë fillimisht përpjekjet përmes rrugëve institucionale, por nuk do ta përjashtojë mobilizimin qytetar. “Ne gjithmonë e zgjedhim rrugën e parë, institucionale, por do t’ia tregojmë vendin edhe në forma tjera zonjës Trendafilova e secilit që provon me na shkelë sakrificën tonë”, ka deklaruar ai, duke shtuar se protestat do të mbeten në opsionet e organizatës. Një pjesë e kritikave të tij iu drejtua edhe presidentes së Kosovës, Justina Shiroka-Pula, lidhur me dekretimin e Ligjit për Gjykatën Speciale. Syla ka vënë në pikëpyetje arsyet e vonesës, duke pretenduar se presidentja mund të jetë duke u frikësuar nga diçka. “Pse nuk e ka bërë deri tash, me gjasë frikësohet nga diçka”, ka thënë Syla. Ai ka kritikuar gjithashtu kryeministrin Albin Kurti, duke kërkuar që mbështetja e shprehur për ligjin në Kuvend të pasohet me veprime konkrete. Në përfundim, nënkryetari i OVL-UÇK-së ka theksuar se organizata do të vazhdojë të kërkojë zgjidhje institucionale, por do t’i mbajë të hapura edhe format e tjera të reagimit në mbrojtje të ish-krerëve të UÇK-së dhe interesave që ajo përfaqëson.
