Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Këshilli i Sigurimit i Organizatës së Kombeve të Bashkuara mban sot mbledhjen për situatën në Kosovë, ku në fokus do të jenë zhvillimet politike, gjendja e sigurisë, dialogu me Serbinë dhe e ardhmja e misionit të UNMIK-ut. Mbledhja pritet të nisë në orën 21:00 sipas kohës së Kosovës, ndërsa raportin e fundit të Sekretarit të Përgjithshëm të OKB-së pritet ta prezantojë shefi i UNMIK-ut, Peter Due. Dokumenti përfshin periudhën nga 16 marsi deri më 15 shtator 2026. Sipas raportit, ndonëse gjendja e përgjithshme e sigurisë vlerësohet si e qëndrueshme, përparimi në zbatimin e marrëveshjeve të dialogut Kosovë–Serbi mbetet i kufizuar. Kjo e rikthen në vëmendje hendekun ndërmjet marrëveshjeve të arritura dhe zbatimit të tyre në praktikë. Në diskutime pritet të trajtohen edhe zhvillimet institucionale në Kosovë, situata në veri të vendit dhe mosmarrëveshjet ndërmjet autoriteteve qendrore dhe atyre lokale. Raporti e përshkruan gjendjen në veri si të qetë, por të brishtë, duke përmendur çështje që lidhen me kompetencat komunale, pronat dhe veprimet e Policisë së Kosovës. Një tjetër temë me rëndësi është dialogu i ndërmjetësuar nga Bashkimi Evropian. Sipas dokumentit, gjatë periudhës së raportimit nuk është zhvilluar takim i nivelit të lartë, ndërsa përfaqësuesi i posaçëm i BE-së, Peter Sørensen, ka vazhduar kontaktet me të dyja palët. Zbatimi i Marrëveshjes së Ohrit të vitit 2023 mbetet ndër çështjet kryesore të procesit. Në mbledhje pritet të diskutohen edhe rikthimi i gjyqtarëve dhe prokurorëve serbë në sistemin e drejtësisë së Kosovës, përgjegjësia për sulmin e armatosur në Banjskë dhe çështja e personave të zhdukur gjatë luftës. Sipas raportit, deri më 15 shtator 2026, fati i 1.579 personave ende nuk ishte zbardhur.
