Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Deputeti i Partisë Demokratike të Kosovës, Përparim Gruda, ka konfirmuar se deputetët e PDK-së do të jenë të pranishëm në Kuvendin e Kosovës sot në orën 11:00, duke pritur nisjen e seancës nga kryesuesi Avni Dehari dhe Lëvizja Vetëvendosje. Në një deklaratë televizive, Gruda e cilësoi gjendjen aktuale institucionale si “anarki të plotë” dhe kritikoi ashpër drejtimin e seancës konstituive nga Dehari, duke e akuzuar atë për standarde të dyfishta pasi i dha fjalën kryeministrit në detyrë Albin Kurti, ndërsa deputetëve të opozitës u refuzoi të drejtën e debatit. Përveç kritikave për mbarëvajtjen e seancës, Gruda zbuloi edhe detaje nga ofertat politike të bëra ndaj partisë së tij, duke konfirmuar se Vetëvendosje i ka ofruar PDK-së vetëm postin e kryetarit të Kuvendit. Ai e vlerësoi këtë pozitë si kryesisht ceremoniale në raport me pushtetin e përgjithshëm, duke argumentuar se një skenar i tillë do t’i mundësonte Kurtit marrjen e të gjitha funksioneve kryesore, përfshirë edhe atë të presidentit. Pavarësisht këtyre mospajtimeve, Gruda konfirmoi se grupi parlamentar i PDK-së do të marrë pjesë në seancën e radhës.
