Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Ish-presidenti i Kosovës, Hashim Thaçi, do të vazhdojë të qëndrojë në paraburgim deri në shpalljen e aktgjykimit në rastin që po zhvillohet në Hagë ndaj tij, Kadri Veselit, Rexhep Selimit dhe Jakup Krasniqit. Trupi Gjykues i Dhomave të Specializuara ka refuzuar kërkesën për lirimin e Thaçit dhe ka vendosur vazhdimin e paraburgimit. Ky është vendimi i 27-të për vazhdimin e kësaj mase ndaj tij. Në vendimin e 10 gushtit, gjyqtarët kanë vlerësuar se nuk ka informacion të mjaftueshëm për të konstatuar se Thaçi do t’i shmangej drejtësisë në rast lirimi. Megjithatë, sipas Trupit Gjykues, vazhdon të ekzistojë rreziku që ai të mund të pengojë procedurat ose të ndikojë te dëshmitarët. Aktgjykimi ndaj Thaçit, Veselit, Selimit dhe Krasniqit pritet të shpallet më 16 shtator 2026. Për këtë arsye, kryegjyqtari Charles Smith ka vendosur që të mos paraqiten më parashtresa lidhur me rishikimin e ardhshëm të paraburgimit të Thaçit, i cili ishte planifikuar për 9 tetor. Gjykimi ndaj katër ish-krerëve të UÇK-së po zhvillohet në Hagë që nga viti 2023. Prokuroria i akuzon ata për një sërë veprash penale që pretendohet se janë kryer gjatë dhe pas luftës në Kosovë, ndërsa të gjithë të akuzuarit janë deklaruar të pafajshëm.
