Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Në një mbledhje komemorative, kushtuar njërit prej organizatorëve kryesorë të demonstratave të vitit 1981, Bajrush Behramit, i cili ndërroi jetë të dielën në moshën 62-vjeçare u tha se ai i ka pasur të gjitha virtytet që i ka një patriot: mençurinë, gatishmërinë për sakrificë, por edhe përkushtimin që deri në fund ta ndjekë idealin e lirisë së Kosovës. Në emër të bashkëveprimtarëve, Hamit Hamiti, tha se për një burrë si Bajrushi do të kishte nevojë Kosova dhe institucionet e saja, e veçanërisht institucioni ku punonte, Qendra e Studentëve.
“Do të kalojnë vite pa Bajrushin, edhe familja e tij, miqtë dhe të gjithë ata që e kanë njohur dhe me të cilët ka punuar do të ndiejnë zbrazëtin që do ta krijojë mungesa e tij, mirëpo këtë zbrazëti do ta plotësojë kujtimi i paharrueshëm i figurës së tij, e plotësojnë gjurmët që ai ka lënë për punën dhe veprimtarinë e tij. Bajrushi u përket emrave të cilët jetojnë edhe pas vdekjes“, tha Hamiti. Kryetari i Shoqatës së veteranëve të UÇK-së, dega në Podujevë, Fahri Balaj tha se Bajrushi veproi pa bërë shumë zhurmë. “Jetoi dhe veproi pa bërë shumë zhurmë, por duke bërë shumë punë dhe lënë shumë gjurmë në historinë e re të kombit tonë, siç jetoi dhe shkoj nga kjo botë pa bërë shumë zhurmë por duke na lënë kujtime më të mira, duke na mësuar si duhet jetuar e qëndruar drejt “, tha ai.
